34 години од формирањето на Армијата: Одбележување во Скопје и Штип

Со повеќе настани во Скопје и Штип денеска ќе биде одбележан 18 август – Денот на Армијата, со кој се одбележуваат 34 години од формирањето на современата македонска Армија.

— реклама —

Централниот дел од одбележувањето во Скопје ќе се одржи во касарната „Илинден“. Во 19 часот единица на артилерискиот баталјон ќе изведе почесна артилериска стрелба со 10 плотуни од шест артилериски орудија. Претходно, во 18 часот, ќе биде изведена пробна стрелба со еден плотун од шест орудија.

— реклама —

Одбележувањето ќе продолжи и во касарната „Јане Сандански“ во Штип, каде што ќе биде извршена смотра на 2. пешадиски баталјон и други армиски единици. На настанот се очекува да присуствуваат претставници на повисоката команда на Армијата, градоначалници од зоната на одговорност на 2. пешадиски баталјон, директори и раководители на јавни претпријатија и установи, како и претставници на верските заедници.

Датумот 18 август е избран за Ден на Армијата во чест на 18 август 1943 година, кога на Славеј Планина бил формиран баталјонот „Мирче Ацев“, кој се смета за прва организирана воена формација на Народноослободителната војска на Македонија.

— реклама —

Процесот на формирање на современата македонска Армија започнал во 1992 година, по договорот што тогашниот претседател Киро Глигоров го потпишал со раководството на ЈНА за дислокација на федералната армија од територијата на Република Македонија.

Денес Армијата е дел од НАТО, откако Северна Македонија на 27 март 2020 година стана 30. полноправна членка на Алијансата.