Армијата на Македонија денеска прослави 33 години од своето постоење со пораки за иднината и најави за модернизација
Централна свеченост што се одржа во касарната „Јане Сандански“ во Штип, беше проследена од државниот и воениот врв, а во фокусот беа пораките за безбедност, стабилност и нови планови за модернизација.
Претседателката и врховен командант на вооружените сили, Гордана Сиљановска-Давкова, истакна дека Армијата повеќе од три децении ја гради својата улога како чувар на татковината и гаранција за стабилноста. Премиерот Христијан Мицкоски порача дека Армијата е основа за развој и создавање на сигурна иднина за граѓаните. И опозициската СДСМ го честиташе празникот, нагласувајќи дека армиските припадници се симбол на безбедност и сигурност.
Модернизација и нов кадар
Министерот за одбрана, Владо Мисајловски, најави продолжување на процесот на модернизација, кој ќе опфати набавка на нови возила, униформи и хеликоптери. Дополнително, е планиран прием на 300 нови професионални војници. Овие мерки се дел од континуираните напори за усогласување со НАТО-стандардите, во кои е вклучена и набавката на оклопни возила од САД.
Безбедносни ризици и евроинтеграции
Сиљановска-Давкова предупреди дека застојот во евроинтеграциите претставува сериозен безбедносен предизвик не само за Западен Балкан, туку и за Европската Унија. Таа подвлече дека државата мора да ги развива своите капацитети за кризен менаџмент и да ги усогласи со оние на НАТО, имајќи предвид глобалните нестабилности.
Предлог за НАТО клинички центар
На свеченоста, претседателката предложи Штип да биде избран како локација за изградба на хибриден клинички центар на НАТО. Според идејата, центарот во мирнодопски услови би бил достапен за македонските граѓани, додека во услови на конфликт би имал функција во рамките на Алијансата.
ФОТО: ФБ
