Во поширокото подрачје на Атина се поставени 388 камери за автоматско откривање возила што поминуваат на црвено светло, како дел од програмата за подобрување на безбедноста во сообраќајот.
Проектот, финансиран преку Фондот за закрепнување и отпорност на Европската Унија, е реализиран од регионалната власт на Атика, а локациите за поставување на камерите се избрани во соработка со грчката полиција, врз основа на анализи на сообраќајните несреќи и ризичните раскрсници.
Камерите ќе работат 24 часа дневно и ќе регистрираат исклучиво прекршоци поврзани со поминување на црвено светло. За секој прекршок ќе бидат испратени шест фотографии и едно видео до грчката полиција како доказен материјал. Од надлежните уверуваат дека системот е дизајниран така што не овозможува идентификација на лицата кои се наоѓаат во возилото.
Властите најавија дека првите 100 камери ќе бидат поврзани со националниот дигитален систем за евиденција на сообраќајни прекршоци до август, по што ќе започне автоматското евидентирање на прекршоците и изрекувањето парични казни.
Гувернерот на регионот Атика, Никос Хардаљас, изјави дека системот има за цел да ја подобри безбедноста на патиштата, истакнувајќи дека поминувањето на црвено светло е едно од најопасните однесувања во сообраќајот.
Поставувањето на камерите е дел од поширока стратегија за безбедност во сообраќајот во регионот Атика, која опфаќа 31 проект со вкупна вредност од 192,9 милиони евра. Во тек се или се во постапка за реализација 18 од предвидените проекти.
