Германскиот производител Audi најави значителна промена во својата стратегија, оценувајќи дека ерата на глобалните автомобили е завршена. Компанијата во иднина ќе развива модели прилагодени на потребите на поединечните пазари, бидејќи купувачите во Европа, Кина и САД имаат сè поразлични барања.
Според техничкиот директор на Audi, денешните разлики во навиките и очекувањата на потрошувачите се толку големи што еден ист автомобил повеќе не може успешно да ги задоволи сите пазари.
Како дел од новата стратегија, Audi во Кина, во соработка со компанијата SAIC, формираше посебен бренд наречен AUDI, без препознатливото лого со четирите прстени. Овие возила ќе бидат наменети исклучиво за кинескиот пазар и ќе се разликуваат и по дизајнот и по технологијата од глобалните модели на компанијата.
Од Audi објаснуваат дека европските купувачи и натаму најмногу го ценат квалитетот на изработката, физичките копчиња и возните карактеристики, додека кинеските возачи бараат напредни функции базирани на вештачка интелигенција, поврзани дигитални системи, гласовно управување и модерни дигитални кокпити.
Компанијата нагласува дека нема да престане да ги продава своите глобални модели во Кина, но очекува најголемиот раст на тој пазар во иднина да го остварува преку новиот бренд AUDI.
Во меѓувреме, Audi подготвува и нов дизајнерски правец за своите глобални модели. Првиот сериски автомобил со новиот изглед се очекува во 2028 година, кога треба да пристигне електричниот наследник на моделот A4.
Покрај новиот дизајн, компанијата најавува и поквалитетни ентериери, како и враќање на поголем број физички копчиња во возилата, што е одговор на барањата на дел од купувачите.
