Службеното возило „Ауди А6“, кое во изминатите години беше во употреба на поранешниот градоначалник на Струга, Рамиз Мерко, е продадено на јавна аукција за 1.350.000 денари, односно околу 22.000 евра.
Според информациите, автомобилот го купил нов сопственик од битолскиот регион. Градоначалникот на Струга, Менди Ќира, потврдил дека приходите од продажбата ќе бидат искористени за намалување на финансиските обврски на општината и за отплата на дел од наследениот долг.
Продажбата на ова возило беше меѓу првите мерки што ги најави новото општинско раководство по преземањето на функцијата.
Пред да биде понудено на јавна аукција, возилото било запленето од извршител од Охрид поради неизмирени финансиски обврски на Општина Струга. Наддавањето започнало со почетна цена од 10.000 евра, а на крајот автомобилот бил продаден за околу 22.000 евра.
Луксузното „Ауди А6“ било набавено од Општина Струга пред шест години и претставувало службено возило на тогашниот градоначалник Рамиз Мерко.
