По повеќе години, познатиот број 37 повторно ќе се најде на скопските улици, но овојпат со нова траса и поинаква намена. Линијата ќе биде повторно воспоставена со цел подобро да ги поврзе Радишани и Бутел со останатите делови од градот.
Претседателот на Советот на Град Скопје, Даме Димитровски, информира дека новата траса за првпат ќе го стави во функција булеварот „Словенечка“, а линијата директно ќе ги поврзува Радишани и Бутел со средните училишта во Карпош и со Скопје Сити Мол.
„Оваа стара табла со бројот 37 е вистински потсетник на некои поинакви времиња во нашиот град. Денес, сепак, овој познат број добива сосема ново, модерно и практично значење“, вели Димитровски.
Според најавата, во текот на летото линијата ќе започне со промотивен режим, со цел учениците и родителите навреме да се запознаат со новата траса и возниот ред.
Од 1 септември, линијата 37 треба да продолжи со редовен режим на сообраќање.
Проектот, како што посочува Димитровски, е реализиран во координација со градоначалникот на Скопје Орце Ѓорѓиевски и Општина Бутел, а е дел од најавените политики за подобрување на јавниот превоз и мобилноста во главниот град.
