Бебе избодено повеќе од 10 пати пронајдено мртво во куфер во Атина

Шокантен случај ја потресе Атина, откако во изнајмен стан во населбата Кипсели било пронајдено замрзнато тело на бебе, скриено во куфер. Според форензичкиот извештај, на телото биле откриени повеќе од 10 убодни рани на грбот.

Форензичарите утврдиле дека убодите биле со различна длабочина и дека токму повеќекратните повреди најверојатно ја предизвикале смртта. Поради состојбата во која било пронајдено телото, не можело прецизно да се утврди ниту времето на смртта, ниту возраста на бебето. Првичните проценки се дека детето било на возраст од околу осум до девет месеци.

— реклама —

Телото било пронајдено во неделата во изнајмен стан на улицата Тасос во Кипсели. Во тој момент, куферот го носеле 38-годишна Германка и нејзината 15-годишна ќерка, кои наводно се подготвувале да го напуштат станот.

Жената првично им кажала на надлежните дека бебето било нејзино и дека починало пред околу осум месеци.

— реклама —

Полицијата ги уапсила жената, нејзиниот 43-годишен грчки партнер и ќерката поради сомнение дека не го пријавиле пронаоѓањето на мртвото тело. Уапсен е и 26-годишен маж со авганистанско потекло, кој тврди дека е во врска со 15-годишната девојка, поради сомнение за поврзаност со дрога.

— реклама —

Во меѓувреме, 15-годишната девојка и две момчиња на возраст од девет и 12 години се сместени под заштитен надзор во Детската болница „Аја Софија“. Се вршат ДНК-анализи со цел да се утврдат нивните меѓусебни роднински врски и врската со лицата кои се претставувале како нивни родители.

Полицијата при претресот пронашла и секс-играчки во куферот.

Според досегашните информации, полицајците пристигнале во станот во неделата попладне, откако сопственикот пријавил неплатена кирија, одбивање на станарите да го напуштат објектот и сомнение за употреба на дрога.

Истрагата продолжува, а надлежните треба да ги утврдат точните околности за смртта на бебето, како и одговорноста на лицата кои се наоѓале во станот.