Изјавите за можен прекин на огнот во Либан предизвикаа нови политички тензии во Израел, откако министерот за национална безбедност Итамар Бен-Гвир јавно се спротивстави на каков било договор за примирје, оценувајќи дека воените операции треба да продолжат.
Во интервју за израелската јавна телевизија КАН, крајнодесничарскиот министер изјави дека Израел не смее да се согласи на прекин на огнот во Либан и го повика премиерот Бенјамин Нетанјаху да му ја пренесе оваа позиција на американскиот претседател Доналд Трамп.
„Трамп е вистински пријател, но мора да му кажеме дека не можеме да прифатиме прекин на огнот во Либан. Ние ги носиме одлуките, а нашите војници постигнуваат добри резултати“, изјави Бен-Гвир.
Неговите ставови доаѓаат во период кога во израелските политички и безбедносни кругови растат несогласувањата околу меморандумот за разбирање меѓу САД и Иран и неговите можни последици врз ситуацијата на либанскиот фронт.
Израел и Либан утре треба да го одржат петтиот круг директни разговори во Вашингтон. Преговорите, кои започнаа во април со посредство на САД, имаат цел да придонесат за запирање на конфликтот во Либан.
Во меѓувреме, дел од израелските функционери изразуваат загриженост дека евентуален договор меѓу Вашингтон и Техеран би можел дополнително да го зајакне Иран и неговите регионални сојузници.
Израелскиот портал „i24News“, повикувајќи се на неименувани функционери, објави дека во Тел Авив постои страв дека американската администрација не ја разбира целосно идеологијата на Иран и Хезболах.
Според истите извори, премиерот Нетанјаху им наложил на министрите да избегнуваат лични напади кон американскиот претседател.
Според официјалните податоци на либанските власти, од 2 март досега во израелските напади загинале повеќе од 4.100 лица, додека над 12.000 се повредени. Израел и натаму задржува присуство во делови од јужен Либан, од кои некои ги контролира со децении, а други беа заземени за време на конфликтот во периодот 2023-2024 година.
