„Бев подготвен да умрам“: 17-годишник погоден со гумен куршум на протестите во Тирана

Протестите во албанската престолнина Тирана ескалираа, откако полицијата употреби солзавец и водени топови за да ги растера демонстрантите кои се приближија до зградите на Министерството за економија и Владата. Во текот на судирите биле забележани и приведувања, а 17-годишен демонстрант изјавил дека бил погоден со гумен куршум во вратот.

— реклама —

Откако демонстрантите се упатиле кон Министерството за економија, полицијата испукала големи количества солзавец. Подоцна, пред владината зграда, полициските возила употребиле водени топови, додека густи облаци солзавец го прекриле булеварот „Дешморет е Комбит“. На снимките, според медиумските извештаи, се гледаат и полицајци кои од терасата на владината зграда фрлаат патрони со солзавец кон насобраните граѓани.

— реклама —

Седумнаесетгодишник во изјава за „Њуз 24“ раскажал дека бил во првите редови и повикувал на единство кога бил погоден од непосредна близина. Тој изјавил дека на почетокот не разбрал што се случува и дека другите демонстранти му помогнале.

„Бев во првиот ред и викав да се обединиме. Додека викав, ме погодија со гумен куршум одблизу. Не сфатив веднаш што се случува, ми се заврте во главата. Другите демонстранти ми помогнаа“, изјавило младото момче, упатувајќи остри пораки и до премиерот Еди Рама.

— реклама —

Полицијата и специјалните единици подоцна започнале нова акција за растерување, при што приведувале демонстранти. Дел од насобраните се обидувале да ги спречат приведувањата, по што дошло до физички пресметки.

Антивладините протести во Албанија траат повеќе од четири месеци и редовно собираат илјадници граѓани. Незадоволството е поттикнато и од проектот за изградба на луксузен хотел поврзан со Иванка Трамп, ќерката на американскиот претседател Доналд Трамп, и нејзиниот сопруг Џаред Кушнер. Проектот стана симбол на обвинувањата за корупција и нееднаквост во земјата.