Без државен регистар и со бројни бариери: слепите лица бараат подобри услови

Слепите и слабовидните лица во Македонија секојдневно се соочуваат со низа пречки што им го отежнуваат самостојното и безбедно движење, од недостиг на бел стап и тактилни патеки до нефункционални звучни семафори и тротоари зафатени од паркирани автомобили. Проблемите беа посочени на дебата во Собранието, каде што беше побарано поголемо внимание од институциите и подобра пристапност во физичката и дигиталната средина.

— реклама —

Беира и Кети, две девојки што говореа на настанот, ги споделија своите искуства и побараа посериозен пристап кон надминувањето на бариерите. „Државата мора да ни го олесни животот“, порачаа тие, нагласувајќи дека пристапноста не е поволност, туку основен услов за самостоен и достоинствен живот.

— реклама —

Посебно внимание беше посветено на поддршката за децата со оштетен вид. Таа треба да опфаќа учење за ориентација во просторот, безбедно движење, грижа за себе и користење помагала. Раната и системската поддршка е важна за нивното вклучување во општеството и за развивање поголема независност во секојдневниот живот.

На дебатата беше отворено и прашањето за дигиталната пристапност. Учесниците побараа таа да стане правило, а не исклучок, посочувајќи дека порталот „Мои услуги“ и голем дел од јавните дигитални платформи сè уште не ги исполнуваат стандардите за пристапност. Веб-страниците и апликациите треба да овозможат полесно користење преку тастатура, гласовна контрола и асистивни уреди.

— реклама —

Надлежните уверуваат дека се преземаат мерки за подобрување на условите за слепите и слабовидните лица. Целта, како што беше истакнато, е да се изгради општество во кое се почитуваат различностите, се отстрануваат бариерите и секој човек има реална можност да живее самостојно и достоинствено.

Дополнителен проблем е недостигот од прецизни податоци за бројот на лицата со оштетен вид во земјава. Процените се движат од четири илјади до десет илјади слепи и слабовидни лица, но точната бројка не е позната бидејќи сè уште не е воспоставен државен регистар. Отсуството на ваква евиденција го отежнува планирањето и спроведувањето мерки и политики што треба да одговорат на нивните потреби.