Битолчанка пријавила дека партнерот ја давел и ѝ се заканувал со убиство, тој избегал од полициска станица

Дваесет и едногодишна битолчанка пријавила дека околу година и половина трпела физичко и психичко насилство од својот партнер, кој ѝ се заканувал дека ќе ја убие, ја удирал со тупаници и ја давел со голи раце.

По пријавата, осомничениот избегал низ прозорец од просториите на СВР Битола, додека полициските службеници се обидувале да го лишат од слобода,

— реклама —

Случајот девојката го пријавила на 10 ноември, но, како што раскажала нејзината мајка Бети Ангеловска, од страв досега не го пријавувала насилството. По последниот напад, девојката била однесена во болница, каде што ѝ биле прегледани повредите на главата, лицето и вратот.

— реклама —

По пријавата, осомничениот доброволно дошол во полициската станица во придружба на родител. Но, кога му било соопштено дека ќе биде задржан, избегал низ отворен прозорец од просторијата за задржување.

Од Министерството за внатрешни работи потврдија дека по него интензивно се трага. За случајот е известен и Одделот за внатрешна контрола, криминалистички истраги и професионални стандарди, кој треба да ги утврди околностите под кои се случило бегството и евентуалната одговорност на полициските службеници.

— реклама —

Мајката тврди дека семејството поседува пораки од социјалните мрежи во кои осомничениот упатувал закани кон девојката и нејзиното семејство, меѓу кои и закани со убиство.

— реклама —

Во меѓувреме, по проценка на Центарот за социјални работи, девојката е сместена во шелтер-центар поради страв за нејзината безбедност. Таа се појавила на судско рочиште на 13 ноември, но осомничениот не дошол. Поради неуредна достава на поканата, рочиштето е презакажано за 18 ноември.

Мајката упати апел до министерот за внатрешни работи Панче Тошковски да ја заштити нејзината ќерка и да спречи евентуални нови последици.