Благица Ласовска од Општинскиот комитет на ВМРО-ДПМНЕ од Свети Николе е новата претседателка на Унијата на жени на ВМРО-ДПМНЕ.
Таа беше избрана во стандардна партиска процедура на оваа носечка партиска функција откако поранешната претседателка Даниела Рангелова се повлече од функцијата по сопствена иницијатива.
Благица Ласовска е родена на 8.3.1970 во Штип. По националност е Македонка. Магистер по менаџмент во образование и образовни политики, УГД Штип.
Моментално таа е една од најангажираните пратенички во Македонското собрание со што претставува еден од носечките столбови во заштитата на интересите на граѓаните на Република Македонија.
„Извршниот комитет на ВМРО-ДПМНЕ одлучи за нов Претседател на Унијата на жени на ВМРО-ДПМНЕ да ја назначи Благица Ласовска, која до сега беше ВД Претседател. Благица Ласовска е поранешен Претседател на УЖ Свети Николе, поранешен член на Извршниот Комитет на Унијата на жени и актуелен пратеник во Собранието на Република Македонија од редовите на ВМРО-ДПМНЕ.
Извршниот комитет на ВМРО-ДПМНЕ на вчерашната седница одлучи за Секретар за меѓународна соработка да го назначи Тимчо Муцунски. Тимчо Муцунски е докторанд и асистент на правниот факултет при УКИМ и поранешен заменик министер за информатичко општество и администрација. Муцунски во изминатите години извршувал повеќе функции во ВМРО-ДПМНЕ, од кои член на Извршниот комитет на Унијата на млади сили, како и советник за меѓународни односи на Претседател на ВМРО-ДПМНЕ. Извршниот комитет на ВМРО-ДПМНЕ со искажаната доверба на Ласовска и Муцунски верува дека со својата посветеност и капацитет ќе ги исполнат целите и политиките на ВМРО-ДПМНЕ“, велат од ВМРО ДПМНЕ .
