Блокирана депонијата „Краста“ од жителите на околните населени места: Шест месеци се гушат во чад од депонијата

Долготрајниот пожар на кумановската депонија „Краста“ предизвика нов револт кај жителите од околните населени места, кои од денес ја блокираат депонијата и го спречуваат влезот на камионите на комуналното претпријатие.

Жителите на Пчиња, Студена Бара, Вакаф и околните места тврдат дека со месеци се соочуваат со чад од депонијата и бараат надлежните институции итно да го решат проблемот. Поради блокадата, отпадот од Куманово во моментов не се носи и не се депонира на „Краста“.

— реклама —

Тие бараат целосно гаснење на пожарот и конкретни мерки за заштита на населението. Според нив, состојбата е влошена до степен што живеењето во околните населени места станало неподносливо, а утринава дел од децата не заминале на училиште поради чадот.

— реклама —

Жителите најавуваат и доставување барање до Владата и здравствените институции за поставување мерни станици, со кои би се следело нивото на загадување во населените места во близина на депонијата.

Тие посочуваат дека претходно добиле ветување дека најдоцна до 2 октомври ќе биде обезбедена механизација за гаснење на пожарот, но велат дека тоа не било реализирано.

— реклама —

Од комуналното претпријатие, пак, информираат дека преземаат активности за надминување на состојбата. Според директорот, во изминатите денови биле ангажирани механизацијата на претпријатието и механизација од противпожарната бригада, додека цистерни со вода непрекинато го натопувале теренот.

— реклама —

Од вчера се ангажирани и два багера за дотур на земја. Дополнително, по вчерашниот вонреден состанок на кризниот штаб, Општина Куманово одвои четири милиони денари за санација на дефектите на механизацијата на комуналното претпријатие.

Од претпријатието очекуваат дека засилените активности во наредните денови ќе придонесат за подобрување на состојбата и намалување на чадот. Директорот признава дека состојбата не е добра и дека револтот кај локалното население е голем.