Штабот во Куманово бара деблокирање на депонијата „Краста“ и непречено одлагање на сметот

Општинскиот штаб за заштита и спасување на Општина Куманово одржа состанок на кој беше разгледана актуелната состојба со депонијата „Краста“, при што беа утврдени дополнителни мерки за нејзино деблокирање, непречено одлагање на сметот и спречување на можни последици по здравјето на граѓаните.

На состанокот присуствуваа претставници на надлежните институции и јавни претпријатија, меѓу кои ЈП „Чистота и зеленило“, ТППЕ Куманово, ЈП „Водовод“, Дирекцијата за заштита и спасување, Центарот за јавно здравје, МВР, Државниот инспекторат за животна средина, Општата болница и Основното јавно обвинителство во Куманово.

— реклама —

Штабот одлучи да остане на заклучоците од претходниот состанок, а дополнително ги задолжи институциите, во рамките на своите надлежности и меѓусебна координација, да ги преземат сите законски мерки за деблокирање на депонијата. Од СВР Куманово се бара да постапи по барањето на ЈП „Чистота и зеленило“ за координација и отворање коридор за непречено депонирање на отпадот.

Една од мерките предвидува ЈП „Чистота и зеленило“ континуирано да користи градежна механизација за третирање на депонираниот смет со земја. Предвиден е и секојдневен дотур на земја и несогорлив градежен шут од ископи, кој ќе се разастира врз отпадот донесен во текот на денот.

— реклама —

За подобра контрола на депонијата, ќе се постават дополнителни камери за видеонадзор, вклучително и термовизиски камери. Предвидено е и засилување на стражарските служби и физичкото обезбедување, како и санација на оштетените делови од заштитната ограда и поставување нова на местата каде што недостига.

— реклама —

Дополнително, директорот на ЈП „Чистота и зеленило“ е задолжен, во соработка со локалното население, да формира еко-патрола составена од претставници на месните заедници и невладини организации од селата Пчиња, Студена Бара, Вак’в и Винце. Групата ќе врши неделен мониторинг на состојбата на депонијата.

Центарот за јавно здравје – Куманово треба да изготви информација за актуелната состојба и препораки за превентивно дејствување, со цел да се спречат евентуални последици од нередовното собирање и депонирање на сметот.

Мерките опфаќаат и дезинфекција на локациите за собирање отпад, според план и препораки на Центарот за јавно здравје, како и контрола на сливните решетки и шахтите за атмосферска вода од страна на ЈП „Водовод“. Доколку е потребно, ќе се изврши нивно чистење, санација или замена за да се обезбеди нивна функционалност.

Со овие мерки, Општинскиот штаб има за цел да ја подобри контролата и безбедноста на депонијата „Краста“ и да овозможи непречено собирање и одлагање на комуналниот отпад во Куманово.