BMW, според неофицијални информации, се откажува од развојот на нов теренец што требаше да биде директен конкурент на легендарната Mercedes G-класа.
Според порталот BMW Blog, проектот не го добил конечниот потпис од управата и најверојатно нема да влезе во сериско производство. Информацијата се темели на извори блиски до проектот, додека германскиот производител сè уште нема официјална потврда.
Новиот модел, познат под интерната ознака G74, наводно требало да биде развиен врз модифицирана платформа на BMW X5. Се шпекулираше дека ќе биде духовен наследник на моделот XM, чие производство се очекува да заврши во 2028 година.
Претходно, директорот на BMW M, Франк ван Мел, изјави дека не би бил против развој на моќен M теренец, а и минатогодишните извештаи укажуваа дека компанијата сериозно размислува за влез во сегментот на луксузни теренски возила.
Покрај BMW, интерес за овој сегмент покажуваат и други премиум производители, меѓу кои Genesis, Audi и Cadillac, кои сакаат да им конкурираат на моделите како Mercedes G-класа и Range Rover.
