Богдановиќ им честиташе на студентите, но го пофали Вучиќ: „Покажа дека е вистински господин и државник“

Претседателот на Српската демократска лига, Саша Богдановиќ, ја поздрави изборната победа на студентската листа во Србија, но истовремено упати пофалби и до Александар Вучиќ за неговото досегашно владеење и за прифаќањето на изборниот пораз.

Во објава на Фејсбук, Богдановиќ оцени дека Србија покажала демократска зрелост и дека изборните резултати треба да бидат почеток на нов период во кој победниците ќе ги исполнуваат дадените ветувања.

— реклама —

„Осамна ново утро во Србија. Србија ја покажа силата на волјата и достоинственото држење и организираше фер и демократски избори. Честитки до победниците. Од денес зборовите треба да ги претворите во дела“, напиша Богдановиќ.

Тој упати честитки до Србија, оценувајќи дека земјата му покажала на светот што претставува вистинска демократија, а посебно се осврна и на Вучиќ.

— реклама —

„Секоја чест и на Обединета Србија и на Александар Вучиќ за сè добро и корисно што досега е направено за напредокот на Србија, како и за чесното и праведно прифаќање на изборните резултати“, наведе Богдановиќ.

Претседателот на Српската демократска лига го нарече Вучиќ „вистински господин и државник“, истакнувајќи дека, според неговата оценка, тој секогаш се грижел за Србите во регионот.

„Александар Вучиќ покажа дека е вистински господин и државник, но и човек кој секогаш се грижел за сите Срби во регионот“, порача Богдановиќ.

— реклама —

Во продолжение нагласи дека интересите на Србија треба да бидат над интересите на секој поединец и политичка партија.

„Србија никогаш не била само еден човек, ниту само една партија, а нејзиното повеќевековно постоење е најдобар доказ дека интересот на Србија е над секој поединец“, напиша тој.

Богдановиќ ја заврши објавата со пораката дека волјата на граѓаните треба да биде почитувана, повикувајќи се на изреката „Гласот на народот е гласот на Бога“.

„Да живеат Србија и Македонија. Да живеат братските односи меѓу Србија и Македонија“, порача претседателот на Српската демократска лига.