Пејачката Бони Тајлер се разбудила од индуцирана кома во Португалија, каде што се опоравува откако доживеала срцев застој по итна операција.
Како што пренесуваат британските медиуми, 75-годишната музичка ѕвезда во мај била подложена на хируршка интервенција поради проблеми со цревата, при што ѝ било отстрането слепото црево. По операцијата, лекарите морале да ја реанимираат поради срцев застој.
„Бони повеќе не е во кома, но сè уште е во тешка состојба. Иако нејзината состојба се подобрува, процесот на закрепнување е бавен“, изјавил претставник на пејачката за „The Sun“.
Според информациите, Тајлер и понатаму се наоѓа на Одделот за интензивна нега во болница во Фаро, но лекарите очекуваат таа целосно да закрепне.
Нејзин близок пријател, Либерто Меалја, открил дека здравствените проблеми започнале во Лондон, каде што пејачката побарала лекарска помош, но првичните прегледи не покажале ништо сериозно.
„Таа реши да отпатува во Алгарве, каде што почна да чувствува силни болки во стомакот. Два дена подоцна замина во приватна болница, од каде итно беше префрлена во болницата во Фаро бидејќи ѝ пукнало слепото црево и мораше веднаш да биде оперирана“, изјавил Меалја.
За полесно закрепнување, лекарите ја ставиле во индуцирана кома, соопштил претходно нејзиниот тим.
Поради здравствената состојба, сите настапи на Бони Тајлер се откажани до крајот на август. Нејзиниот менаџмент им се заблагодари на обожавателите ширум светот за поддршката и пораките со желби за брзо оздравување.
