Бран откази во Н1: Десет новинари заминуваат од телевизијата

Десет новинари на српската телевизија Н1 дале отказ во период кога медиумот се соочува со притисоци од новите сопственици, објави неделникот „Време“.

— реклама —

Меѓу новинарите кои заминуваат се искусната новинарка и водителка Даница Вучениќ, репортерките Жаклина Таталовиќ и Ксенија Павков, како и Жана Булаиќ, Наташа Миљковиќ, Миа Бјелогрлиќ, Ана Новаковиќ, Сања Косовиќ, Адам Сантовац и Димитрие Ѓуриќ.

— реклама —

Ова се случува во период кога редакцијата на порталот Nova.rs, според објавените информации, е изложена на притисок од раководството поради одбивањето да прифати наметнување нов главен уредник. Во редакцијата постои стравување дека таквиот потег би можел да го загрози независното новинарство.

За заминувањето на колегите на социјалната мрежа Икс се огласи и новинарот на Н1, Младен Саватовиќ, кој им посака успех и се осврна на годините поминати во редакцијата.

— реклама —

„На моите колеги кои решија да заминат и да се откажат од Н1 им посакувам сѐ најдобро и среќа. Неверојатни 12 години се зад нас, во мојот случај осум. Направивме многу како редакција, за учебници, на што треба да бидеме горди. И веројатно ќе се видиме повторно во нов филм, како што би рекле некои луѓе“, напиша Саватовиќ.

Според текстот, случувањата доаѓаат девет дена пред изборите закажани за 25 октомври, во време на зголемена загриженост за независноста на медиумите.