Бразилскиот претседател го нападна Трамп: Нема право да им се заканува на други држави

Бразилскиот претседател Луиз Инасио Лула да Силва, познат како Лула, денеска упати остри критики кон американскиот претседател Доналд Трамп, оценувајќи дека нема право да им се заканува на други држави.

Изјавата на Лула следува откако Трамп овој месец предупреди дека „целата цивилизација ќе исчезне“ во Иран доколку Техеран не го отвори Ормускиот теснец.

— реклама —

„Трамп нема право наутро да стане и да ѝ се заканува на некоја држава“, изјави Лула за шпанскиот весник „Ел Паис“. Тој нагласи дека според американскиот устав, претседателот ја дели одговорноста за војна и надворешна политика со Конгресот.

Лула порача дека најмоќните светски лидери мора да покажат поголема одговорност за зачувување на мирот.

— реклама —

Односите меѓу Бразилија и Вашингтон и натаму остануваат затегнати, и покрај минатогодишната средба меѓу двајцата претседатели, по која дојде до мало намалување на тензиите и олеснување на царинските мерки.

— реклама —

Бразилскиот претседател повторно повика на реформа на Советот за безбедност на Обединетите нации, вклучувајќи укинување на правото на вето на петте постојани членки и поголемо учество на држави од Африка и Латинска Америка.

„Време е Обединетите нации повторно да добијат кредибилитет“, изјави Лула.

— реклама —

Тој зборуваше за „Ел Паис“ во пресрет на посетата на Шпанија, каде што ќе се сретне со шпанскиот премиер Педро Санчес и ќе учествува на форум на прогресивни лидери.

На состанокот во Барселона се очекува да присуствуваат и мексиканската претседателка Клаудија Шејнбаум, како и претседателот на Јужноафриканската Република Сирил Рамафоса.