Европската Унија направи чекор кон воведување можност мигрантите на кои им е одбиено правото на престој да бидат депортирани во центри надвор од Унијата, откако европратениците и владите на земјите-членки постигнаа договор за новите правила, пишува Ројтерс.
Мерката е дел од поширокото заострување на миграциската политика на ЕУ под притисок на десничарските партии, иако бројот на нерегуларни пристигнувања на мигранти минатата година се намалил за 26 проценти и достигнал најниско ниво од 2021 година.
Предлог-законот, кој сè уште треба формално да биде одобрен од земјите-членки и Европскиот парламент, беше предложен од Европската комисија минатата година. Според Комисијата, новите правила ќе ги поедностават процедурите и ќе им овозможат на владите поефикасно да ги спроведуваат депортациите, при почитување на основните човекови права.
Организациите за човекови права, сепак, остро реагираа на договорот. Според нив, новите мерки би можеле да доведат до злоупотреби и прекумерна употреба на притвор.
Според новите правила, земјите од ЕУ ќе можат да формираат таканаречени „центри за враќање“ надвор од Унијата, каде ќе бидат испраќани лица чии барања за азил се одбиени или кои добиле наредба да ја напуштат ЕУ. Тие ќе можат да бидат депортирани и во земји со кои немаат никаква претходна врска.
„Со новите правила имаме поголема контрола врз тоа кој може да дојде во ЕУ, кој може да остане и кој треба да замине“, изјави европскиот комесар за миграција Магнус Брунер.
Засега не се открива кои држави би можеле да бидат домаќини на ваквите центри.
Новото законодавство предвидува и продолжување на периодите на притвор, како и воведување казни за лицата кои нема да соработуваат со властите. Меѓу можните мерки се забрани за влез, парични казни и кривични санкции.
Неколку земји веќе разгледуваат вакви модели. Холандија, заедно со Данска, Германија, Грција и Австрија, работи на воспоставување заеднички центри за враќање и транзит на мигранти.
Холандската влада најави дека очекува конкретни чекори до крајот на годинава, повикувајќи се на пренатрупаните центри за прием на азиланти и зголемениот притисок врз системот за азил.
