Британски министер предупредува: Не смееме да им ја оставиме вештачката интелигенција на олигарсите

Велика Британија не смее да дозволи развојот и контролата на вештачката интелигенција да останат во рацете на технолошките олигарси, предупреди британскиот министер за вештачка интелигенција Канишка Нарајан, нагласувајќи дека државата мора активно да учествува во развојот на технологијата што веќе го менува пазарот на трудот, економијата и безбедноста.

Во гостување во подкастот „Political Thinking“ на Би-би-си, Нарајан оцени дека светот се соочува со технолошка трансформација споредлива со индустриската револуција, а во одредени аспекти и поголема од неа. Според него, државите мора да извлечат поука од минатото, кога индустријализацијата донела економски напредок, но предизвикала и сериозни последици за голем број работници.

— реклама —

„Клучно е британската јавност и демократијата да ја преземат моќта, наместо да им ја препуштат на технолошките моќници и олигарсите“, порача министерот, без да посочи конкретни компании или поединци.

Неговото предупредување доаѓа во период кога вештачката интелигенција сè повеќе заменува работни задачи. Британската банкарска групација „Барклис“ најави укинување на 5.000 работни места во рамки на мерките за зголемување на ефикасноста, кои вклучуваат и примена на вештачка интелигенција.

Нарајан смета дека државната улога не смее да се сведе само на донесување регулативи, туку дека Велика Британија мора да развива сопствени технолошки капацитети. На тој начин, според него, земјата ќе може да влијае врз условите за работа, економскиот развој и безбедноста, наместо целосно да зависи од технологии создадени во странство.

— реклама —

„Мора да ја градиме технологијата за да можеме да се одбраниме и да го поттикнеме сопствениот раст. Во моментов сме целосно зависни од други земји за клучни делови од технологијата“, истакна тој.

Како пример за потенцијалот на вештачката интелигенција, министерот откри дека британските власти користеле напредни модели за проверка на кибербезбедноста на владините системи. Со вложување од само 13.000 фунти биле откриени 500 претходно непознати безбедносни слабости во значајни делови од јавниот сектор.

— реклама —

Тој не откри кои конкретни системи биле засегнати, но посочи дека ваквите резултати покажуваат колку технологијата може да биде корисна за откривање безбедносни пропусти.

Британскиот министер ја отфрли и тезата дека Соединетите Американски Држави и Кина се единствените значајни сили во развојот на вештачката интелигенција. Според него, американските лаборатории се обратиле до британскиот Институт за безбедност на вештачката интелигенција за тестирање на нивните модели пред да бидат пуштени во јавна употреба.

Нарајан најави и можност во претстојниот британски буџет да бидат предвидени дополнителни мерки поврзани со развојот на вештачката интелигенција, но не откри конкретни детали.

Неговите изјави следуваат по претходните предупредувања за растечките кибербезбедносни ризици и можноста напредните системи за вештачка интелигенција да бидат злоупотребени за напади врз државната инфраструктура.