Брнабиќ: Србија не е проруски ориентирана, од почетокот на војната ја поддржува Украина

Претседателката на српското Собрание, Ана Брнабиќ, изјави дека Србија не е проруски ориентирана и дека од почетокот на војната ја поддржува Украина, отфрлајќи ги оценките дека Белград е „руски тројански коњ“ во Европа.

— реклама —

Во интервју за „Еуроњуз“, Брнабиќ истакна дека Србија од почетокот на руската инвазија во февруари 2022 година ѝ обезбедила на Украина повеќе од 60 милиони евра финансиска и хуманитарна помош, но без воена поддршка.

Таа нагласи дека Србија била единствената земја од Западен Балкан која во најтешките зимски месеци испорачувала електроенергетска опрема, генератори и резервни делови за Украина, користејќи и сопствени резерви.

— реклама —

„Србија не е руски тројански коњ. Ние сме независна и суверена држава со речиси илјадагодишна историја. Имаме традиционално добри односи со Русија, но тоа не значи дека сме на иста линија по сите прашања“, изјави Брнабиќ.

— реклама —

Таа потсети дека Русија ја критикувала Србија поради гласањето во Обединетите нации, со кое беше осудена руската агресија врз Украина, како и поради помошта што Белград ѝ ја дава на украинската страна.

Осврнувајќи се на евроинтеграциите, Брнабиќ оцени дека Европската Унија применува двојни стандарди кон Србија. Како пример ги наведе препораките на ОБСЕ за изборните услови, тврдејќи дека од Србија се бара целосно да ги спроведе за да отвори нов кластер во преговорите, додека тоа не се бара од некои други земји кандидати.

И покрај тоа, таа порача дека Белград останува посветен на членството во Европската Унија и дека ќе продолжи со реформите и исполнувањето на европските критериуми.