Брнабиќ застана во одбрана на „Информер“ и повика на протест

Вршителката на должноста претседател на Србија, Ана Брнабиќ, повика на протест пред Регулаторното тело за електронски медиуми (РЕМ) во Белград, тврдејќи дека се загрозени слободата на медиумите, говорот и мислењето во Србија.

Во објава на Инстаграм, Брнабиќ порача дека протестот е одбрана на демократските вредности, кои, според неа, биле доведени во прашање по само една недела, како што ја нарече, „терор и самоволие на Студентската листа“. Таа тврдеше дека во 14-годишното владеење на Александар Вучиќ и Српската напредна партија не бил затворен ниту еден медиум.

— реклама —

Брнабиќ додаде дека таа и нејзините сопартијци, додека извршувале државни функции, не тужеле ниту еден медиум, и покрај бројните, како што оцени, невистини објавени за нив. Истовремено, обвини дека затворањето медиуми во Србија, со која сега управува Студентската листа, започнало веднаш.

— реклама —

Таа ги повика граѓаните да се соберат во 10:45 часот пред седиштето на РЕМ, на плоштадот „Никола Пашиќ“, каде што за 11 часот е закажана редовна седница на Советот на регулаторното тело, отворена за јавноста.

На дневниот ред на седницата треба да се најде иницијативата на 32 организации на граѓанското општество и медиумски здруженија, кои бараат одземање на дозволата за емитување програма на телевизијата „Информер“.

— реклама —

Претседателот на Советот на РЕМ, Стевица Смедеревац, претходно соопшти дека побарал Службата за надзор и анализа да ги собере сите претставки што се однесуваат на „Информер“ и да ги спореди со наводите во иницијативата за одземање на дозволата.

— реклама —

Повикот за протест следува по минатонеделните случувања пред редакциите на „Информер“ и „Пинк“, кога групи незадоволни граѓани се собраа пред медиумите, а програмата на телевизијата „Информер“, која важи за поддржувач на Вучиќ и Српската напредна партија, накратко беше прекината по упад во студиото.

Студентската листа ги осуди упадите и повика да се избегнува одмазда, но истовремено побара одговорност за јавно изнесениот збор и за долгогодишното кршење на професионалните кодекси, вклучително и кривична одговорност за ширење омраза кон политичките неистомисленици и противници.