Бројот на цивилни жртви во Украина во јули достигнал највисоко ниво од мај 2022 година, покажува најновиот извештај на Обединетите нации за човековите права во Украина.
Во текот на минатиот месец биле убиени најмалку 437 цивили, додека 2.610 лица биле ранети. Тоа е зголемување на бројот на жртвите за 30 отсто во однос на јуни и за 70 отсто во споредба со јули минатата година.
„Бројот на загинатите достигна највисоко ниво регистрирано од мај 2022 година“, посочуваат од Набљудувачката мисија на Обединетите нации за човекови права во Украина.
Од почетокот на годинава, Обединетите нации регистрирале вкупно 1.839 загинати и 10.638 ранети цивили во Украина. Тоа претставува зголемување од 44 отсто во споредба со истиот период минатата година и повеќе од двојно зголемување во однос на 2024 година.
„Цивилното население е изложено на зголемени ризици поради засилената употреба на ракети и беспилотни летала во урбаните центри, на наведувани бомби во градовите поблиску до линијата на фронтот, како и на беспилотни летала со краток дострел“, истакна шефицата на мисијата на Обединетите нации, Даниел Бел.
Особено тешко погоден во јули бил украинскиот главен град, Киев, каде што биле регистрирани најмалку 54 загинати и 202 ранети цивили. Руските сили во повеќе наврати извршиле масовни напади врз Киев со балистички и крстосувачки ракети.
Беспилотните летала и ракетите со долг дострел остануваат главна причина за цивилните жртви, се наведува во извештајот.
Во меѓувреме, Обединетите нации посочуваат дека во јули се зголемил и бројот на цивилни жртви во Русија. Руските власти пријавиле 79 загинати и 601 ранет цивил, но овие податоци не можеле независно да бидат потврдени поради ограничениот пристап и недостигот на информации од терен.
Во последните месеци нападите се засилуваат од двете завојувани страни, четири и пол години по почетокот на целосната руска инвазија врз Украина.
