Грција продолжува да се бори со повеќе големи пожари, кои за само една недела уништија повеќе од 12.000 хектари шуми и обработливо земјиште, додека експертите предупредуваат дека еден од пожарите најверојатно ќе биде класифициран како мегапожар.
Нов пожар избувнал доцна синоќа на јонскиот остров Кефалонија, додека пожарникарите и понатаму се борат со огнените фронтови во повеќе делови од земјата.
Првичните проценки покажале дека во пожарите во Коринтскиот Залив изгореле повеќе од 6.500 хектари, а сериозно било погодено и популарното крајбрежно место Порто Гермено, во близина на Атина. Иако жителите биле евакуирани, локалните власти соопштија дека десетици куќи се оштетени или целосно уништени.
Претходно оваа недела, пожарите на островите Крит и Парос уништиле уште околу 6.000 хектари. Сепак, метеорологот и експерт за шумски пожари, Теодор Јанарос, оцени дека пожарот кај Порто Гермено зафатил повеќе од 10.000 хектари, речиси двојно повеќе од првичните проценки.
„За жал, многу е веројатно, ако не и речиси сигурно, дека овој пожар ќе биде класифициран како мегапожар“, напиша Јанарос на Фејсбук.
Грчкиот министер за цивилна заштита, Евангелос Турнас, изјави дека противпожарната служба е „на границата на своите можности“, бидејќи секојдневно интервенира на десетици пожари.
Во текот на неделата загинале тројца пожарникари – двајца на Крит и еден на Пелопонез. Според Турнас, силните ветрови дополнително ја отежнувале работата на воздушните сили, бидејќи во некои случаи авионите не можеле ниту да полнат вода ниту безбедно да слетаат поради силните турбуленции.
И покрај тоа што ветерот ослабнал, властите предупредуваат дека областа на Атина, соседна Војотија и островот Евија и натаму се соочуваат со речиси максимален ризик од пожари.
Во реонот на Порто Гермено се ангажирани речиси 500 пожарникари, додека уште околу 100 интервенираат на нов пожар во областа Егијалија, во северниот дел на Пелопонез.
