Бројот на загинати во силниот земјотрес во Јапонија се искачи на 28, спасувачите сè уште трагаат по преживеани

Бројот на загинати во силниот земјотрес со магнитуда од 7,1 степен според Рихтеровата скала, што во вторникот ја погоди јапонската префектура Кумамото на островот Кјушу, се искачи на 28, соопштија јапонските власти.

Главниот секретар на кабинетот, Минору Кихара, изјави дека спасувачките операции продолжуваат со полн интензитет и дека потрагата по преживеани претставува „трка со времето“.

— реклама —

Екипите и натаму пребаруваат урнатини во трговски центар и во оштетена фабрика за хартија, каде што се стравува дека има затрупани лица. Според локалните власти, шест лица сè уште не покажуваат знаци на живот.

— реклама —

Меѓу загинатите, пет лица го загубиле животот во трговскиот центар „Еон“ во градот Кашима, каде по земјотресот се случила и експлозија, додека осуммина загинале во фабриката на компанијата „Нипон пејпер индустрис“ во Јацуширо, каде што биле сериозно оштетени повеќе оџаци.

Железничкиот сообраќај на брзата линија Кјушу Шинкансен меѓу станиците Кумамото и Кагошима-Чуо сè уште е во прекин, додека надлежните ја проценуваат штетата на инфраструктурата.

— реклама —

Илјадници домаќинства остануваат без електрична енергија и вода, а повеќе од 10.000 луѓе се сместени во евакуациски центри.

Префектурата Кумамото и претходно беше погодена од катастрофален земјотрес во 2016 година, кога загинаа најмалку 50 лица.

Јапонија се наоѓа во еден од најсеизмички активните региони во светот и редовно се соочува со силни земјотреси.