Повеќе од два месеца по разорните земјотреси што ја погодија Венецуела, бројот на загинати достигна 6.125, соопшти претседателот на венецуелскиот парламент, Хорхе Родригез.
Според официјалните податоци, речиси 61.000 лица добиле медицинска помош во болниците. Родригез информираше и дека досега се расчистени околу 16,5 проценти од урнатините што останаа по катастрофата.
Во меѓувреме, привремената претседателка Делси Родригез ја бранеше реакцијата на властите, отфрлајќи ги критиките дека спасувачките служби и војската реагирале предоцна и не обезбедиле навремена помош за настраданите, вклучително и за лицата кои останале затрупани под урнатините.
Венецуела беше погодена од два силни земјотреси со јачина од 7,2 и 7,5 степени според Рихтеровата скала, кои се случија во интервал од само 39 секунди. Најтешко беше погодена северната држава Ла Гваира, каде што стотици објекти беа оштетени, а голем дел од нив станаа небезбедни за живеење или целосно се урнаа.
