Бројот на загинати во разорните земјотреси што ја погодија Венецуела се искачи на 4.490, додека повеќе од 19.500 луѓе се сместени во привремени прифатни центри, соопштија властите.
Според најновите официјални податоци, во катастрофата се повредени 16.740 лица, а засега не е објавен бројот на исчезнатите.
Двата силни земјотреси со магнитуда од 7,2 и 7,5 степени според Рихтеровата скала ја погодија престолнината Каракас и крајбрежната држава Ла Гваира на 24 јуни, при што се урнаа бројни повеќекатни згради и беа предизвикани големи материјални штети.
За семејствата што останаа без своите домови, властите поставија привремени кампови на стадиони, плоштади и други јавни површини во Ла Гваира и во околината на Каракас, каде што во моментов се згрижени 19.583 лица.
Претседателот на Националното собрание, Хорхе Родригес, најави дека Владата во наредните денови ќе почне со доделување станови на семејствата што останале без покрив над главата, а станува збор за објекти чија изградба била во тек уште пред земјотресите.
Тој посочи дека за изградба на нови домови, финансиска помош за кирија и станбени кредити ќе бидат потребни значителни средства. Во Ла Гваира веќе се обезбедени повеќе од 40 градежни парцели со вкупна површина од околу 584.000 квадратни метри за изградба на нови станбени објекти.
Во меѓувреме, меѓународната помош продолжува да пристигнува. Министерот за надворешни работи Иван Хил соопшти дека во земјата пристигнала хуманитарна помош од Русија, додека Амбасадата на САД информираше дека испорачала 100.000 пакети помош за погоденото население.
