По најавите за блокада на трите гранични премини меѓу Македонија и Бугарија од страна на бугарската фондација „Македонија“, Амбасадата на Бугарија во Скопје повика протестите да не доведат до прекин на сообраќајот и ограничување на движењето меѓу двете земји.
Во реакцијата, бугарската дипломатска мисија наведува дека е непродуктивно бугарски организации да се квалификуваат како „антимакедонски“ поради нивните ставови за билатералните односи и политиките на властите во Скопје.
„Плурализмот е суштинска карактеристика на демократијата и неговото изразување не е насочено против никого, туку има цел да отвори простор за дијалог и подобро меѓусебно разбирање“, наведуваат од Амбасадата.
Оттаму истакнуваат дека го поддржуваат правото на мирен протест како демократска придобивка, но воедно апелираат протестните активности да не резултираат со блокади на граничните премини или на патните правци што ги поврзуваат двете соседни држави.
Во соопштението се нагласува дека интересот на Бугарија е да се продлабочуваат контактите меѓу граѓаните од двете земји, да се развива економската соработка и да се зајакнуваат културните врски.
„Ова е најдобриот начин да се спротивставиме на омразата и да покажеме колку сме блиски, не само преку заедничката историја, туку и преку заедничката европска иднина“, наведуваат од бугарската Амбасада.
Од дипломатското претставништво додаваат дека незадоволството и загриженоста на бугарското општество за случувањата во Скопје треба да се изразуваат на конструктивен и европски начин.
