Случајот со опожарувањето на возила пред Амбасадата на Бугарија во Скопје доби нов правен тек, откако Основното јавно обвинителство Скопје утврдило индиции за постоење на потешко кривично дело и предметот го препратило до Основното јавно обвинителство за гонење организиран криминал и корупција.
Според Обвинителството, покрај првичното сомнение за кривично дело „Предизвикување општа опасност“, во текот на постапката биле обезбедени сознанија што упатуваат на можни елементи на кривичното дело „Загрозување лица под меѓународна заштита“.
По преземањето на предметот, Обвинителството за гонење организиран криминал и корупција донело Наредба за спроведување истражна постапка против осомниченото лице поради основано сомнение дека на 15 јуни 2026 година, со опожарување на возила пред Амбасадата на Република Бугарија во Скопје, создало значителна опасност за животот и телото на лица под меѓународноправна заштита.
Како што соопштуваат од обвинителството, станува збор за возила што ги користеле воениот аташе на Република Бугарија во земјава и други вработени во дипломатското претставништво.
Со оглед на тоа што делото спаѓа во групата кривични дела против човечноста и меѓународното право и е поврзано со заштитата на дипломатски претставници согласно меѓународните конвенции, надлежниот јавен обвинител побарал од судот определување мерка притвор во траење од 30 дена за осомничениот.
Лицето претходно се наоѓало во осумдневен притвор, определен во рамки на скратена постапка.
