Опозицијата во Град Скопје со критики за партиски назначувања на претставници на град Скопје во 24 училишните одбори во средните училишта на територија на градот.
„Треба да се изјасниме за 72 членови на училишните одбори, значи продолжува практиката за полнење со ваши партиски кадри, како што беше претходно пополнувањето со ВД членови на управните и надзорните одбори. Тогаш беа 117, сега 72 лица, повторно ниту знаеме кои се луѓево, ниту како дојдовте до овие имиња, кој ги предложи, дали дојдоа од општинските организации на ВМРО- ДПМНЕ”, реагираше советничката Катерина Цаневска.
Нивната улога во овие одбори според Законот за средно образование е значајна, а власта, нагласи, е најзаинтересирана за нивната улога во разрешување на директори, вршење интервјуа со новопредложените кандидати. Одборот во кој има и претставници од надлежното министерство, родителите, му го предлага на градоначалникот името за кое дале зелено светло за нов директор.
„И бидејќи за ова ви се потребни докажани кадри, од каде ги извадивте овие 72 имиња?Дали се сите експерти по образование, не требаше ли како што ветувавте соработка и заедничко дејствување и со опозицијата?Можеби ќе ви предложевме покомпетентни личности”, рече Цаневска.
Претседателот на Советот Даме Димитровски одговори дека изборот го извршила и предложила група советници, но не кажа кои и како се одбрани, а дека кандидатите се видни личности во заедницата.
Опозицијата гласаше против, но власта ги надгласа и си избра свои луѓе во училишните одбори.
