Царината воведува паметни граници и автоматизирани царински терминали

Царинската управа започна со реализација на проект за модернизација на граничната инфраструктура, со кој ќе се воведат паметни системи за автоматизација на царинските терминали. За проектот се обезбедени два милиони евра грант од Европската Унија.

— реклама —

По спроведена јавна набавка е потпишан договор со избраниот изведувач за испорака на потребната опрема, а целосната имплементација на проектот се очекува да заврши до средината на следната година.

— реклама —

Со автоматизацијата ќе се овозможи побрз проток на стоки преку границите, значително ќе се намали времето на чекање и ќе се намалат оперативните трошоци за економските оператори. Новите дигитални рампи и автоматски ваги ќе ги заменат постојните системи, а увозот, извозот и транзитот ќе се евидентираат автоматски за неколку секунди по влезот на товарните возила на царинските терминали.

— реклама —

Системот ќе биде поврзан со видеонадзор и автоматско препознавање на регистарските таблички, додека паралелно се спроведува постапка за набавка на софтвер што ќе ги интегрира сите компоненти во единствен систем.

— реклама —

Од Царинската управа посочуваат дека новите решенија ќе овозможат поефикасна контрола, побрз проток на легалната трговија во согласност со европските стандарди, како и намалување на влијанието на човечкиот фактор, што треба да придонесе за поефикасна борба против криминалот и корупцијата.