Цената на гасот над 70 евра: ЕУ повикана да ја намали потрошувачката

Цената на природниот гас на европскиот пазар повторно надмина 70 евра за мегават-час, што е ниво последен пат забележано за време на енергетската криза во 2022 година. Поради наглиот раст на цените, европскиот комесар за енергетика Дан Јоргенсен ги повика земјите членки да разгледаат мерки за намалување на потрошувачката.

Складиштата за гас во Европа во моментов се исполнети околу 70 отсто, додека цената на холандскиот референтен пазар TTF веќе неколку недели се задржува над 70 евра за мегават-час.

— реклама —

„Се соочуваме со ценовна криза, која е поврзана со кризата во снабдувањето“, предупредил Јоргенсен во писмо до министрите за енергетика на земјите членки.

Тој навел дека покрај напнатоста на глобалниот пазар на течен природен гас, исклучително топлото и сушно лето дополнително ги оптоварило електроенергетските системи на неколку земји од ЕУ.

— реклама —

Јоргенсен ги повикал државите да разгледаат мерки со кои би се поттикнало дополнително полнење на складиштата или би се намалила потрошувачката на гас и електрична енергија.

Меѓу можните мерки се наведуваат поттикнување на домаќинствата да ја намалат потрошувачката на електрична енергија во периодите на најголема побарувачка, ограничување на греењето во јавните објекти и исклучување на непотребното јавно осветлување во текот на ноќта.

— реклама —

Целта е да се намали потрошувачката на гас што се користи за производство на електрична енергија.

Сепак, Јоргенсен предупредил дека во моментов „не постојат непосредни ризици за безбедноста на снабдувањето“.

Министрите за енергетика на ЕУ треба да се состанат на 29 септември во Ирска на неформални разговори, каде што се очекува да се разговара и за состојбата со енергетските пазари.

Сличен повик Јоргенсен упатил и во март, кога ги повикал земјите членки да ги зголемат резервите на гас во складиштата, но тогаш повикот немал очекуван ефект.