Цената на нафтата падна под 90 долари

Цената на нафтата на светските берзи падна под 90 долари за барел, откако трговците проценија дека најновите американски санкции кон Иран претставуваат помал ризик за снабдувањето со нафта отколку евентуалното проширување на вооружениот конфликт.

На лондонскиот пазар, цената на барелот попладнево се движеше околу 89,46 долари, што е пад од 2,71 долари во однос на претходното затворање. На американскиот пазар, барелот поевтини за 2,56 долари и достигна 82,45 долари.

— реклама —

Американскиот министер за финансии Скот Бесент во понеделникот ги претстави новите мерки чија цел е дополнително ограничување на економските врски на Иран со остатокот од светот. Сепак, тој не откри кои земји би можеле да бидат опфатени, ниту кога конкретно би стапиле на сила санкциите.

Иран најави дека ќе возврати на проширените американски санкции, со кои администрацијата на Доналд Трамп се обидува да ги ограничи главните извори на приходи на Техеран. Иако Вашингтон ги предупреди земјите да ги прекинат деловните врски со Иран или да се соочат со секундарни санкции, конкретните казнени мерки засега не се воведени.

— реклама —

Пазарните аналитичари оценуваат дека префрлањето од закани за воена ескалација кон посилен економски притисок ја намалило загриженоста околу можните прекини во снабдувањето со нафта од Блискиот Исток.

— реклама —

Сепак, ризиците не се целосно отстранети. Иран и натаму има можност да го попречува поморскиот сообраќај, што продолжува да влијае врз цената на нафтата.

Дополнителна загриженост предизвика и инцидент со танкер во близина на Оман. Според британската служба за поморски трговски операции, танкер бил погоден од неидентификуван проектил и останал онеспособен на околу 17 километри североисточно од Аш Шишах.

— реклама —

Во меѓувреме, сообраќајот низ Ормускиот Теснец останува значително намален. Во понеделникот низ овој клучен коридор за светските енергетски испораки поминале само два танкери, што е најмал број танкери со суровини регистриран уште од почетокот на мај.

Поради нарушувањата во снабдувањето предизвикани од конфликтите на Блискиот Исток, дел од земјите веќе почнаа да ги користат комерцијалните и стратешките резерви на нафта.