По тридневниот раст, цените на нафтата утрово забележаа пад на светските берзи, иако тензиите на Блискиот Исток продолжуваат да ја зголемуваат неизвесноста на енергетските пазари.
Цената на суровата нафта Брент се спушти под 97 долари за барел, додека американската сурова нафта WTI се тргуваше околу 95 долари за барел.
Пазарите остануваат под влијание на зголемените тензии меѓу САД и Иран по неодамнешните воени инциденти во регионот. Според извештаите, Иран извршил напади врз американски поморски бази во Бахреин и Кувајт, како и врз комерцијални бродови, откако претходно беше пријавен американски напад врз танкер што пловел кон Иран.
Во фокусот на вниманието и натаму е Ормускиот теснец, еден од најважните поморски коридори во светот преку кој минува значителен дел од глобалната трговија со нафта и течен природен гас.
Иако сообраќајот низ теснецот постепено се зголемил во изминатите две недели, обемот на транспорт сè уште е значително под нивото пред почетокот на конфликтот.
Дополнителен фактор на пазарите се и најновите податоци од САД, кои покажуваат дека залихите на сурова нафта се намалуваат шеста недела по ред, што укажува на континуирана силна побарувачка и ограничена понуда.
Аналитичарите оценуваат дека пазарот останува чувствителен на секоја промена во безбедносната состојба на Блискиот Исток, поради што се очекува цените на нафтата и во наредниот период да бидат под влијание на геополитичките случувања.
