Стравувањата од дополнителни нарушувања во глобалното снабдување со нафта повторно ги раздвижија енергетските пазари, откако ескалацијата на безбедносната состојба на Блискиот Исток предизвика нагло поскапување на суровата нафта.
Нафтата од типот Брент утрово поскапе за повеќе од три долари за барел, поттикната од обновените израелски напади врз Либан, а дополнителен притисок врз пазарите предизвикаа и информациите за експлозии во Иран.
Фјучерсите на Брент пораснаа за 3,20 долари или 3,39 проценти и достигнаа 96,24 долари за барел. Истовремено, американската сурова нафта поскапе за 2,87 долари или 3,17 проценти, достигнувајќи цена од 93,41 долари за барел.
Со ова практично беа избришани загубите од претходниот трговски ден, кога цените паднаа поради надежите за можно намалување на тензиите меѓу САД и Иран.
И покрај тоа што Иран во неделата изврши ракетни напади врз израелски цели како одговор на претходните случувања, американскиот претседател Доналд Трамп изрази уверување дека постои можност за постигнување договор кој би спречил поширок регионален конфликт.
Во меѓувреме, Иран го постави прекинот на огнот во Либан како еден од условите за евентуален мировен договор со Вашингтон. Израел и Либан на почетокот на месецот соопштија дека постигнале договор за прекин на огнот по разговорите одржани во Вашингтон.
Во обид да се ублажат последиците од нарушеното снабдување, земјите членки на ОПЕК+ се согласија на четврто последователно зголемување на производството на нафта во изминатите четири месеци.
Сепак, аналитичарите оценуваат дека оваа одлука ќе има ограничен ефект врз пазарот, бидејќи голем дел од производителите не успеваат да ги достигнат планираните производствени квоти. Причините се поврзани со нарушувањата во транспортот преку Ормускиот Теснец, како и со оштетувањата на енергетската инфраструктура во Русија.
„На сегашниот пазар, реалното влијание од ваквата одлука би било речиси занемарливо“, оцени Хорхе Леон, раководител за геополитички анализи во компанијата „Ристад енерџи“.
Според аналитичарите, додека трае неизвесноста на Блискиот Исток, цените на нафтата ќе останат чувствителни на секоја нова ескалација или дипломатски развој во регионот.
