Четири млади жени јавно проговорија за сексуално злоставување и напади што, според нивните тврдења, ги доживеале додека биле питомки во Воениот колеџ „Арми Фондација“ (Army Foundation College – AFC) во Харогејт, Северен Јоркшир. Во времето на настаните тие имале по 17 години, објави Би-Би-Си.
Една од нив, која во извештајот е именувана како Тили, изјавила дека била силувана од неколку свои колеги војници и дека нападот траел со часови.
„Се чувствував како парче месо“, сведочи таа, додавајќи дека по нападот ја напуштила воената кариера.
Според Би-Би-Си, полицијата во Северен Јоркшир во период од една година примила 16 пријави за сексуални деликти поврзани со оваа воена школа, меѓу кои за сексуален напад, егзибиционизам и воајеризам.
Податоците на британското Министерство за одбрана покажуваат дека од јануари 2018 до јуни 2025 година во училиштето биле евидентирани 176 пријави за несоодветно сексуално однесување, од кои 32 се однесувале на постојаниот персонал, а 144 на млади питомци.
Уште три поранешни питомки раскажале дека биле жртви на сексуални напади, вознемирување и понижување, а дел од нив тврдат дека инструктори давале сексистички коментари, ги оценувале девојките според изгледот и влегувале во нивните спални без најава.
Од британската армија соопштија дека наводите се „исклучително вознемирувачки и сериозни“, нагласувајќи дека во вооружените сили нема место за вакво криминално однесување.
По објавувањето на сведоштвата, британски пратеници и правни експерти побараа независна истрага за случувањата во воената академија, оценувајќи дека станува збор за сериозен системски проблем во заштитата на младите питомци.
