„Четири компании доставија понуди за набавката на 150 електрични автобуси“, вели Николоски

Министерот за транспорт Александар Николоски соопшти дека четири компании доставиле понуди на повторениот јавен повик за набавка на електрични автобуси, кои ќе бидат наменети за јавниот превоз во Скопје и во другите градови низ државата.

— реклама —

Тој најави дека извештајот од евалуациската комисија треба да го добие во понеделник, по што ќе бидат објавени сите детали за пристигнатите понуди.

— реклама —

„Информацијата што ја добив утрово е дека во понеделник ќе ми биде доставен извештајот. На тендерот се пријавиле четири компании и тогаш транспарентно ќе ја информираме јавноста за резултатите од евалуацијата. Очекувам овој пат постапката успешно да заврши и да се реализира набавката на автобусите. Верувам дека компаниите ги земаа предвид забелешките од претходниот повик и подготвија поквалитетна документација“, изјави Николоски при посетата на Општина Кисела Вода.

Тендерската постапка беше затворена во понеделникот, а пристигнатите понуди моментално ги разгледува комисија составена од претставници на Министерството за транспорт и експерти од Машинскиот факултет.

— реклама —

Повикот беше повторно распишан откако претходната постапка за набавка на 150 електрични автобуси и 75 станици за нивно полнење беше поништена.

Со проектот е предвидена набавка на вкупно 150 електрични автобуси, од кои 100 ќе бидат наменети за јавниот превоз во Скопје, а останатите 50 ќе бидат распределени во други градови во земјата.