Четири лица загинаа, над 60 се повредени во руски напад врз трговски центар во Украина

Во руски напад врз трговски центар во Павлохрад, град во Дњепропетровската област, загинале четири лица, а повеќе од 60 се повредени. Нападот врз центарот на градот бил извршен во текот на денот, кога на улиците имало голем број луѓе, а информациите ги потврдија украинските власти.

Украинскиот министер за внатрешни работи Иван Вихивски првично соопштил дека во нападот загинале две лица, а најмалку 18 биле повредени. На терен веднаш биле испратени спасувачки екипи и полиција.

— реклама —

Подоцна, началникот на воената управа на Дњепропетровската област, Олександар Ханжа, соопштил дека бројот на загинатите се зголемил на три, а повредените на 34. Само дваесетина минути подоцна бил објавен нов биланс – четири загинати и повеќе од 60 повредени.

— реклама —

Меѓу повредените има и три деца, момчиња на возраст од 13, 14 и 15 години. Сите повредени се пренесени во болница и се под лекарски надзор.

По нападот избувнал пожар, кој зафатил автомобили, продажни тезги и еден дуќан. Повредени биле и двајца припадници на украинската Државна служба за вонредни ситуации, кои исто така биле пренесени во болница.

— реклама —

Вихивски соопштил дека руските сили од почетокот на годинава извршиле повеќе од 18.000 напади врз Дњепропетровската област, главно со беспилотни летала.

Нападот врз Павлохрад е дел од серијата руски удари врз цивилни цели во Украина. Во текот на истиот ден, руските сили двапати ја нападнале и постројката за преработка на храна во Дњепар, при што загинале две лица, а пет биле повредени.

Ден претходно, во руски напад врз Суми загинале две лица, а 20 биле повредени, додека на 10 септември беспилотно летало погодило и трговски центар во тој град.