Голема спасувачка акција продолжува во Хрватска, во морето и долж брегот на островот Крк, откако четворица португалски државјани исчезнале во Велебитскиот Канал за време на силно невреме. Двајца од нив се пронајдени живи и се медицински згрижени, додека потрагата по преостанатите двајца продолжува.
Една жена била пронајдена нешто пред пладне во морето кај заливот Бутињ, на источната страна на Крк. Таа била извлечена на спасувачки чамец, исцрпена, но без повреди, по што била пренесена на брегот и медицински згрижена.
Околу 13:40 часот бил пронајден и вториот португалски државјанин, на карпите меѓу заливот Огрул и ’Ртот Главина. И тој бил исцрпен и по спасувањето бил пренесен на брегот за медицинска помош.
Во потрагата се вклучени спасувачки чамци од капетаниите во Риека и Сењ, испоставата во Нови Винодолски, авион на хрватската крајбрежна стража, полициски хеликоптер и припадници на Хрватската горска служба за спасување.
Четворицата пријатели претходно тргнале со мал гумен чамец долг околу 1,5 метри од камп северно од Сењ кон Сењ, по што им се изгубила трагата. Чамецот подоцна бил пронајден без патници во заливот Смокова.
Потрагата се одвива во тешки временски услови. Во Велебитскиот Канал било издадено црвено предупредување поради силна бура, со најсилни удари на ветерот од 65 до 100 километри на час.
