Уште еден пациент почина од западнонилска треска на Универзитетската клиника за инфективни болести, со што бројот на починати од оваа инфекција во земјава се искачи на четири.
Станува збор за 76-годишен пациент кај кого претходно лабораториски била потврдена невроинвазивна форма на западнонилска треска. Тој на Клиниката се лекувал 27 дена, но поради тешката форма на инфекцијата, која го зафатила мозокот и мозочната обвивка, како и поради сериозните придружни заболувања, во текот на вчерашното попладне починал.
Директорот на Клиниката, Фадил Цана, информира дека во моментов се хоспитализирани 20 пациенти со западнонилска треска. Кај 18 од нив инфекцијата е лабораториски потврдена, додека двајца се водат како клинички суспектни случаи.
Пет пациенти се наоѓаат на одделот за интензивна нега поради потешка клиничка слика и се лекуваат согласно медицинските протоколи.
Досега 15 пациенти се излекувани и се отпуштени од Клиниката за инфективни болести.
Цана информираше и дека кај 25-годишната пациентка, која претходно била водена како клинички суспектна, дополнително била потврдена невроинвазивна форма на инфекцијата. Во меѓувреме, синоќа бил хоспитализиран и 24-годишен пациент, кој засега се води како суспектен случај. Резултатите од дополнителните испитувања треба да покажат дали и кај него ќе биде потврдена дијагнозата.
Според директорот на Клиниката, сите хоспитализирани пациенти имаат невроинвазивна форма на заболувањето, која бара болничко лекување. Оваа форма, како што објасни, се јавува кај околу еден отсто од инфицираните лица.
Сите досега хоспитализирани пациенти се од Скопје. Цана посочи дека повозрасната возраст претставува независен ризик-фактор за потежок исход кај пациентите со невроинвазивна форма на западнонилска треска, особено кога инфекцијата предизвикува воспаление на мозокот и мозочната обвивка.
