Четврти ден протести во Албанија: Немирите од Тирана се проширија низ земјата, има повредени

Студенти и средношколци четврти ден по ред протестираат против владата во Албанија, а демонстрациите од Тирана се проширија и во повеќе други градови, каде што дојде до судири со полицијата. Безбедносните сили употребиле и солзавец за да ги растераат демонстрантите.

Во главниот град, младите од Тирана и од други делови на земјата се собраа и тргнаа кон Министерството за образование, барајќи промени во државата и оставка од премиерот Еди Рама.

— реклама —

Протестите во Тирана траат четири дена, а претходните три беа одбележани со напнатост и судири, објави „Еуроњуз Албанија“. Според медиумските извештаи, полицијата и за време на денешните демонстрации употребила солзавец против насобраните пред Министерството за образование.

— реклама —

Во Корча протестите ескалирале, при што демонстрантите запалиле контејнери и ги изнеле на улица, а дел од учесниците фрлале камења и други предмети кон полицијата. Судири меѓу демонстрантите и полициските сили биле забележани и во Лежа. Според медиумските извештаи, едно лице се онесвестило на тротоарот, додека две девојки биле повредени во судирите.

Учесниците на протестите, според извештаите, откорнале огради покрај тротоарите, оштетиле сообраќајни знаци и запалиле голем оган на влезот во градот, поради што сообраќајот привремено бил прекинат.

— реклама —

Во Поградец, младите повторно излегле на градскиот булевар и ги продолжиле протестите и покрај претходните приведувања и полициските интервенции. Тие извикувале „Рама, поднеси оставка“ и „Рама во затвор, Бериша во затвор“, алудирајќи на премиерот Еди Рама и опозицискиот лидер Сали Бериша.

Судири меѓу демонстрантите и полицијата биле забележани и во Валона. Во Елбасан, младите, главно средношколци, ја напуштиле наставата и излегле на улиците. Во Камза, средношколците повторно ја бојкотирале наставата и се обиделе да тргнат кон Тирана за да им се приклучат на протестите во главниот град. Нивното движење било запрено од полицијата, а на теренот биле распоредени засилени полициски сили.

Демонстрациите, кои започнаа во Тирана пред четири дена, вториот ден се проширија и во други албански градови. Протестите се проследени со напнатост, судири со полицијата, приведувања и оштетување на јавен и приватен имот. Во претходните денови биле повредени повеќе десетици демонстранти и полицајци.