Црн екран и порака до гледачите на унгарска телевизија: „Се извинуваме, лажевме со години“

Унгарската јавна телевизија М1 направи потег без преседан, прекинувајќи ја редовната програма и емитувајќи порака со која им се извини на гледачите за долгогодишното известување исполнето со политичка пропаганда. Потегот е дел од реформата на јавните медиуми што ја најави новата влада на премиерот Петер Маѓар.

На црн екран беше прикажана пораката: „Јавните медиуми не смеат да лажат. Се извинуваме што го правевме тоа со години. Јавните медиуми ќе бидат реорганизирани за в иднина да бидат независни и веродостојни. Информативната програма привремено се прекинува.“

— реклама —

Истовремено беа прекинати сите информативни и политички емисии на јавната телевизија и радиото, додека политичките вести останаа достапни само преку државната новинска агенција МТИ.

— реклама —

Реформата беше едно од главните предизборни ветувања на Петер Маѓар, кој по доаѓањето на власт најави дека јавниот сервис ќе биде ослободен од политичко влијание и ќе работи според професионални стандарди.

Во рамки на промените беа разрешени директорот на М1, Жолт Немет, како и повеќе уредници и програмски директори. Привремено раководство веќе е назначено, а новите позиции во медиумскиот холдинг МТВА треба да бидат пополнети преку јавни конкурси и во консултација со стручната јавност.

— реклама —

По речиси четири часа прекин, програмата на М1 продолжи во 19:56 часот – време избрано симболично во чест на Унгарската револуција од 1956 година. Наместо вести, беше емитуван филмот „Сведок“, политичка сатира од 1979 година, која ги прикажува пропагандата и апсурдите на сталинистичкиот режим.

— реклама —

Јавните медиуми во Унгарија со години беа обвинувани дека служеле како инструмент на власта на Виктор Орбан. Критичарите тврдеа дека во програмите доминирале политички обоени содржини, антимигрантска реторика, напади врз Европската Унија и невладините организации, како и известување што ја следело руската пропаганда за војната во Украина.

Поранешниот премиер Виктор Орбан ги осуди промените, оценувајќи дека тие претставуваат „уште еден чин на самоволие“ на партијата Тиса. Од друга страна, голем дел од медиумската заедница реформата ја поздрави како историска можност за враќање на независноста и довербата во јавниот сервис.