Црна Гора би можела да го потпише договорот за членство во ЕУ во јуни 2027 година

Црна Гора би можела да го потпише договорот за пристапување кон Европската Унија во јуни 2027 година, според временската рамка што Европската комисија планира да ја објави за завршување на преговорите.

— реклама —

Според нацрт-документот во кој увид имал хрватскиот „Јутарњи лист“, Црна Гора треба до крајот на оваа година да ги затвори сите преостанати преговарачки поглавја. Шест се планира да бидат затворени во ноември, а уште шест во декември. Во текот на пролетта 2027 година би требало да заврши подготовката на нацрт-договорот за пристапување.

— реклама —

Јуни е посочен како можен рок за потпишување на договорот, кој дотогаш треба да биде прифатен од сите 27 земји членки и од Црна Гора, а потоа преведен на службените јазици на Унијата и на црногорски јазик. За членството ќе биде потребна и потврда од Европската комисија, како и согласност од Европскиот парламент.

— реклама —

Сепак, Комисијата нагласува дека станува збор за индикативна временска рамка, која не го предодредува конечниот исход ниту ги ограничува одлуките на европските институции. И по завршувањето на преговорите ќе продолжи да следи дали Црна Гора ги исполнува условите, а во случај на сериозно назадување како крајна мерка може да се примени и одложување на членството.

— реклама —

Европската комисија ќе објави временски рамки и за Албанија, Молдавија и Украина, но нивните рокови ќе бидат претставени како амбиции. Албанија, која по Црна Гора има најголем напредок, треба да затвори уште 31 поглавје, поради што дипломатите на ЕУ оценуваат дека завршувањето на преговорите до крајот на следната година е премногу амбициозна цел.