Црна Гора ќе биде силна поддршка за евроинтеграцијата на Македонија, порача црногорскиот вицепремиер Ивановиќ

Црна Гора ќе продолжи да го поддржува европскиот пат на Македонија и се залага проширувањето на Европската унија да се одвива врз основа на заслугите на секоја држава, порача црногорскиот вицепремиер задолжен за надворешни и европски прашања, Филип Ивановиќ.

— реклама —

На заедничката прес-конференција со вицепремиерот и министер за транспорт Александар Николоски, Ивановиќ истакна дека Европската унија не може да биде целосна без земјите од регионот. Тој, кој е во дводневна работна посета на Македонија, посочи дека Црна Гора е предводник во евроинтегративниот процес и очекува во 2028 година да стане полноправна членка на Унијата.

— реклама —

Ивановиќ нагласи дека членството во ЕУ не значи напуштање на регионот, туку обврска за поддршка на останатите држави во нивните европски аспирации. Тој порача дека Црна Гора ќе биде силна поддршка за Македонија, со желба двете држави што поскоро да станат дел од Унијата.

Двајцата вицепремиери оценија дека политичките односи меѓу Македонија и Црна Гора се одлични и дека нема отворени прашања. Разговарале и за продлабочување на економската соработка, а договориле следната година да се одржи бизнис-форум на компании од двете држави.