Министерството за внатрешни работи на Црна Гора понуди награда од 500.000 евра за информации што директно ќе придонесат за лоцирање, пронаоѓање и апсење на Радоје Звицер (42), по кого е распишана меѓународна потерница преку Интерпол.
Наградата се однесува на веродостојни информации што ќе овозможат негово пронаоѓање и лишување од слобода и што непосредно ќе придонесат во полициските активности и ќе имаат одлучувачко значење за неговото апсење.
Звицер се бара поради сомневања за повеќе тешки кривични дела, меѓу кои создавање криминална организација, тешки убиства, убиство, поттикнување на тешко убиство и обид за убиство преку поттикнување, неовластено производство и трговија со наркотични дроги, недозволено поседување оружје и експлозивни материи, како и перење пари.
Од црногорската полиција наведуваат дека информациите мора да бидат точни и проверливи и директно да придонесат за неговото лоцирање и апсење.
Поради доверливоста и заштитата на лицата што ќе достават информации, тие треба лично да му се обратат на директорот на Управата на полицијата, помошникот директор надлежен за борба против криминалот или началникот на Специјалното полициско одделение. Средбата претходно треба да се најави.
За исплатата на наградата одлучува Владата на Црна Гора, на предлог на Министерството за внатрешни работи. Идентитетот на лицето кое ќе достави информација ќе биде целосно заштитен.
Наградата нема да му следува на лице кое веќе располагало со податоци со кои полицијата била запознаена, на полициски службеници и членови на нивното потесно семејство, ниту на лица кои на кој било начин учествувале во кривичните дела за кои е распишана меѓународната потерница.
