Вработените жени во Црна Гора со дијагностицирана секундарна дисменореја отсега ќе имаат право на менструално отсуство, откако парламентот ги усвои измените на Законот за задолжително здравствено осигурување.
Со новите законски измени, тие ќе можат да користат до два платени дена отсуство месечно, при што ќе добиваат надомест во висина од 100 проценти од платата.
Правото, сепак, нема да важи за сите жени кои имаат менструални болки. Тоа е наменето исклучиво за осигуренички кај кои лекар специјалист ќе утврди секундарна дисменореја – состојба предизвикана од претходно дијагностицирани гинеколошки заболувања.
Во законот се наведува дека оваа состојба може да биде последица на ендометриоза, миоми, воспаление на јајниците, ендометријални полипи, синдром на полицистични јајници и други слични заболувања. Медицинската потврда ќе треба да се обновува еднаш годишно и да му се доставува на работодавачот.
Црна Гора им се приклучува на европските земји кои веќе воведоа слични мерки. Шпанија во 2023 година стана првата европска држава што овозможи платено боледување за жени со онеспособувачки менструални болки, врз основа на лекарска потврда и со надомест преку системот за социјално осигурување.
Португалија, пак, од април 2025 година овозможува до три последователни платени дена месечно за работнички со тешки болки предизвикани од ендометриоза или аденомиоза, без да им бидат нарушени платата или другите работнички права.
Црногорскиот модел е поограничен, бидејќи правото на отсуство е поврзано со конкретна медицинска дијагноза, а не со менструалните болки воопшто. Истовремено, отвора и прашања за заштитата на приватноста и можната стигматизација на жените кои ќе треба да доставуваат чувствителна медицинска документација до своите работодавачи.
