Црногорските власти им забранија влез на 87 српски државјани кои со чартер-лет пристигнаа во Тиват еден ден пред Самитот ЕУ – Западен Балкан, оценувајќи дека нивниот престој може да претставува ризик за националната и внатрешната безбедност на државата.
Според подгоричкиот весник „Вијести“, меѓу патниците имало лица со криминални досиеја и лица кои со години во српските медиуми и од опозициски активисти се поврзуваат со структури блиски до владејачката Српска напредна странка (СНС).
Авионот на „Ер Србија“, кој пристигнал во Тиват во утринските часови, по неколкучасовни проверки бил вратен во Белград во попладневните часови. Според медиумските извештаи, кај дел од патниците биле пронајдени транспаренти со пораки за поддршка на Србија, како и комуникациска опрема.
„Вијести“ наведуваат дека на списокот на патници се наоѓаат лица кои во минатото биле споменувани во јавноста поради инциденти на протести, навивачки групи, обезбедување на партиски простории и други активности поврзувани со политички настани во Србија.
Меѓу имињата што ги објавија медиумите се Далибор Станоевиќ – Боске, Јован Кецман – Цоје, Александар Јанковиќ – Аца Хари, Мирко Радуловиќ, Јово Станаревиќ и Немања Нараци, за кои во различни периоди биле објавувани информации за наводни врски со структури блиски до СНС или за судски постапки и безбедносни инциденти.
По одлуката на Црна Гора, српските медиуми објавија дека на неколку гранични премини биле воведени засилени контроли за црногорските државјани кои влегуваат во Србија. Според извештаите, на премините Гостун, Јабука и Драченовац се формирале долги колони, а патниците биле подложени на детални проверки.
Засега нема официјално објаснување од српските институции за причините за засилените контроли, додека црногорските власти остануваат на ставот дека мерката била донесена врз основа на безбедносна проценка во пресрет на самитот во Тиват.
