Црно лето за Европа: Над 700.000 хектари изгореа годинава, штетата достигна 28,3 милијарди евра

Европската унија годинава се соочува со една од најтешките сезони на шумски пожари, при што досега изгореле околу 700.000 хектари, а во 16 земји членки опожарената површина е над просекот. Податоците ги соопшти еврокомесарката Хаџа Лахбиб во Европскиот парламент, каде што се расправаше за последиците од летото 2026 година.

По најтоплото лето откако се вршат официјални мерења, Лахбиб посочи дека штетата од топлотните бранови, сушите и пожарите во ЕУ годинава веќе достигнала 28,3 милијарди евра. Најголем притисок, според неа, трпи земјоделството.

— реклама —

Европската унија годинава одговорила на сите десет барања за помош во рамките на ЕУ, како и на две барања надвор од Европа. Воздушните сили биле ангажирани 40 пати, а на терен биле испратени 18 тимови со 777 пожарникари од 14 европски земји.

Во моментов ЕУ располага со 18 авиони и пет хеликоптери, од кои еден за првпат целосно е финансиран со европски средства.

— реклама —

Лахбиб најави дека ЕУ се движи кон создавање „европски пожарникари“. Европската комисија планира и воспоставување противпожарен центар на Кипар, наменет за медитеранскиот регион, со шест канадери и полигони за обука на пожарникари.

— реклама —

Во борбата против пожарите се користи и Европскиот информативен систем за шумски пожари (EFFIS), кој преку сателитски снимки и беспилотни летала ги следи пожарите во реално време и ги предвидува опасностите од нивно ширење.

Хрватската европратеничка Жељана Зовко порача дека ЕУ мора да направи чекор од реакција по катастрофите кон систем заснован на превенција, подготвеност и брзо распоредување на заедничките капацитети.

Таа ги посочи годинешните пожари во Хрватска, од големиот пожар во областа на Омиш и Локва Рогозница до актуелниот пожар на Брач, како пример зошто цивилната заштита треба да биде дел од европската безбедност и отпорност.

Во тек е и подготовка на нова реформа на Механизмот на ЕУ за цивилна заштита, за кој во следната повеќегодишна финансиска рамка се предвидуваат речиси 11 милијарди евра. Зовко ја поддржа идејата за посилно поврзување на противпожарните служби на европско ниво и порача дека искуството на пожарникарите треба да биде вклучено во европските одлуки за потребните капацитети и нивното брзо активирање.