Градоначалникот на Скопје, Орце Ѓорѓиевски, најави голема еколошка акција за чистење на градот, која ќе се одржи утре, 30 септември, со почеток во 10 часот.
Како што објави Ѓорѓиевски на социјалните мрежи, во акцијата се очекува да се вклучат неколку илјади волонтери, а ќе биде опфатено целото Скопје, односно сите скопски општини.
Во акцијата, според најавата, ќе учествуваат сите општини, градоначалници, амбасади, ученици, јавни личности, спортисти и граѓани. Целта е преку заедничко чистење да се придонесе за почиста и поуредна околина во скопските населби и маала.
„Утре, 30 септември, во 10:00 часот, ја започнуваме најмасовната еколошка акција за чистење на Скопје, со неколку илјади волонтери и со една заедничка цел – да покажеме колку можеме кога сме сплотени и кога љубовта кон својот град ја претвораме во дело“, напиша Ѓорѓиевски.
Тој ги повика скопјани да им се приклучат на акцијата и да ги повикаат своите пријатели, соседи и колеги.
„Да ги засукаме ракавите и заедно да се погрижиме за улиците по кои секојдневно поминуваме, за парковите во кои растат нашите деца и за маалата што ги нарекуваме свој дом“, порача градоначалникот.
Ѓорѓиевски најави дека акцијата нема да биде еднократна, туку вакви активности ќе се организираат двапати месечно.
„Со редовно чистење, со сè поголемо учество и со заедничка посветеност ќе ја претвориме оваа иницијатива во традиција на која Скопје ќе се гордее“, наведува тој.
Според Ѓорѓиевски, целта е преку редовните акции да се создаде навика за грижа за јавниот простор и да се поттикне поголема одговорност кај граѓаните.
„Да оставиме пример што ќе се следи. Да создадеме навика што ќе трае и по завршувањето на секоја акција. Да ги научиме најмладите на одговорност преку нашите постапки, а на секој што несовесно фрла отпад да му покажеме дека зад чисто Скопје стојат илјадници луѓе што се грижат, работат и нема да се откажат од својот град“, порача градоначалникот.
Тој изрази уверување дека скопјани ќе се вклучат во акцијата и нагласи дека секој придонес е важен.
„Утре, секоја рака е добредојдена и секој придонес е важен. Нека оваа акција биде почеток на една убава промена што сите ќе ја гледаме, но и сите ќе ја чуваме! Да излеземе масовно за нашето Скопје! Да оставиме пример, не ѓубре“, напиша Ѓорѓиевски.
